Rett og plikt til å seie ifrå

• Dette er et innsendt bidrag, og gir uttrykk for skribentens meninger og holdninger. Vil du delta i debatten? Send gjerne inn innlegg hit.

 Derfor ser eg det som min rett og plikt å melde frå til FUS når tillitsvalde og tilsette er uroa over at eit mogleg tariffbyte kan få negative konsekvensar for deira lønns- og arbeidsvilkår. Det tenkjer eg at Monica Johnsen og styret i FUS skal vere svært glade for. At tillitsvalde også seier ifrå viser at dei ynskjer medverknad på slike store og viktige spørsmål, noko dei også etter hovudavtalen har rett til.

At Monica Johnsen synes det er bra at NHOs barnehageovereinskomt ikkje inneheld bestemmelse om pensjon, sjukelønn, feriepengar og arbeidstid er jo sjølve kjernen i bekymringa til dei tilsette. Dette betyr at dersom våre krav om å behalde dei gode ordningane vi har i FUS avtalen i dag ikkje godtas, har vi heller ikkje streikerett for å få dei på plass når ordningane vert flytta til ulike lokale særavtalar. Dette gjeld sjølv om den lokale særavtalen er på konsernnivå. At det bekymrar dei tilsette, meiner eg Johnsen bør ha stor respekt for.

Sjølvsagt står FUS fritt til å organisere seg i den arbeidsgjevarforeininga styret ynskjer. Det er heldigvis organisasjonsfridom i dette landet, men kvifor FUS no vurderer å byte tariffavtale tenkjer eg at det er Monica Johnsen og FUS som må forklare, ikkje eg, slik eg vert oppmoda om i tilsvaret til Johnsen.

Vi har meldt vår uro, både eg som kontaktperson barnehagar i Utdanningsforbundet Vestland og tillitsvalde i FUS. - Uro for om tilsette kan få svekka lønns- og arbeidsvilkår, uro for å miste streikerett og ikkje minst uro for kva dette vil gjere med å rekruttere og behalde tilsette med den naudsynte kompetansen som trengs for å drive gode barnehagar.

Kva FUS vil gjere med vår ytring og bekymring er heilt opp til styret i FUS den 30. april. Det vil dog vere dumt om ein i ettertid vil tenke; «kvifor lytta vi ikkje til dei tillitsvalde».

DEBATT

FUS står fritt